حمام كليوباترا ل سعاد محمد سلامه الجزء الثاني
بينما كان سيزار يُراقب كل خلجات وجهها البهي.
فتحت عوالى عينيها وقع بصرها على سيزار الذى ينظر لها وقالت بجرأه:
ليه بتبص لى كده.
تبسم سيزار قائلاً بتكذيب:ببصلك ازاى ومنين جالك إنى ببص عليكِ من أساسه،كنتِ بتقولى عليا مغرور وبتباهى واضح إن فينا صفات مشتركه.
نظرت له عوالى بخباثه قائله:.هصدقك يا سيزار،طب طالما عنيك مكنتش بتبص عليا كنت بتبص على أيه؟
تجول سيزار بعينيه فى المكان قائلاً:
ببص على الجمال الربانى..اللى هنا فى المكان.
تجولت عوالى بعينيها هى الاخرى ترى الابداع الالهى الذى بالمكان وقالت:
قولى المكان ده ناقصه أيه ويبقى من أجمل شواطئ العالم وينافس المالديف وفينسيا
هنا تحس الطبيعه بتتناغم على رسم لوحه مُبهره، رغم بدائية الشاطئ وأنه شبه مهجور،بس رمل فيه شفا وميه بلون أزرق صافى،شئ لسه موصلتش أيد البشر له تلوثه بشوية خرسانات أسمنتيه ويتقال عليها منتجعات فخمه فاخره بعد شويه يظهر مكان تانى يبِطل زهوة المكان،هنا البدائيه مميزه بـ كتل صخريه تحس الصخور دى زى العشاق اللى جايا تقابل بعضها تطفى حر الأشواق بين أمواج البحر.
نظر سيزار لـ عوالى بإعجاب
نظرت فجأة عوالى له قائله:
أهو ضبطك،عيونك بتبص لى.
تبسم سيزار معترفًا:
أنا فعلاً ببص عليكِ،بصراحه مُعجب ومُتعجب.
تبسمت عوالى قائله:
فزوره دى.
تبسم سيزار قائلاً:
مش فزوره لأ،بس إنتِ غامضه،مش قادر أوصل لحقيقة شخصيتك.
ضحكت عوالى قائله:
للدرجه دى أنا مسببه لك حِيره،بس انا أشبه المكان هنا،زى الموج وزى الصخر،أنا مزيج فى كل حاجه
مزيج بين الهدوء والصخب،زى البحر.
رد سيزار بتساؤل:ويا ترى كمان مزيج بين الثقه والغدر زى البحر برضوا.
ضحكت عوالى قائله:
واضح إنك متأثر من أول لقاء لينا بسفح الجبل،وهيفضل ده إنطباعك عنى إنى غداره.
رد سيزار بنفى:
لأ مش غداره،إنتِ نداهة الجبل ناسيه…إنت حقيقه ولا أسطوره يا عوالى.
إندهشت عوالى ونظرت نحو البحر قائله:. أنا الاتنين يا سيزار أنا الخيال اللى أتحول حقيقه…. “الملعونه”،زي ما بيقولوا عليا هنا بنت الايطاليه اللى سحرت للشيخ جلال وأتجوزها بس طبعًا بعد شويه فاقت من سكرة العشق وعرفت أن العشاق الحقيقيين بيسكنوا حكايات الخيال فقط فى الواقع البطل مش لازم يكون الشجاع اللى يواجه أعراف باليه ويغيرها لأ لازم يرجع لأصله الأعراف دى هى اللى بتورثوا القوه والسطوه.