عهد الدباغ ل سعاد محمد سلامه

فتفوه كنان بحماقة:
اللى جنب أوضة الكلب بتاعي اللى إغتالته ايادي الشر.

نظر له فاروق قائلًا بإستهزاء:
إغتالته إيه.

فأجابه:
كان كلب لولوه ورقيق،مش ذنبه الفضول وحب يتعرف على اهل الشارع،وعض الواد صبري وكدب وقال إن الكلب إتسعر،وبدأ يطارده لحد ما إندهس بين عجلات موتوسيكل الواد صبري..هو قاتل وكان قاصد بينتقم من الكلب.

نظر له فاروق قائلًا:
كلب لولوه ده كان نص طولك،وكان كلب شوارع وجربان
دا أنا لو مكان صبري كنت ضربته بالرصاص،وكان مسعور فعلًا.

-قلوبكم قاسيه،يلا ربنا يرحمه،بفكر لما أخلص جيش أربي قطط شيرازي،بتعجب البنات.

نظر له فاروق وزفر نفسه بصمت وغادر يصفع الباب بقوة،إرتج كنان قائلًا:
معرفش ليه اتعصب وساب الاوضة…

سُرعان ما ضحك قائلًا:
أكيد حجة عشان يروح يكلم الموزة خطيبته.

❈-❈-❈
بعد مرور عِدة اسابيع

صباح
وقفت إجلال أمام فاروق قائله بلوم:
على فكرة إنت غلطان قولى خاطب مكملتش شهر، قولى فى الشهر ده روحت لخطيبتك كام مرة، خدتها وخرجتوا سوا… دي بنت ناس وهتبقي، أو شبة بقت مراتك خلاص لازم تكلمها عشان تتعودوا على بعض شوية.

تنفس فاروق بملل قائلًا بجمود:
ماما أنا مش فاضي للخوارات التافهه دي، ولا ليا فيها، أنا كلمتها عالموبايل كذا  مرة.

رمقته إجلال بنظرة حادة قائلة له بغضب :
كلمتها عالموبايل، وده هيقرب بينكم، والشغل مش أهم حاجة فى الحياة، فين المشاعر الإنسانيه.. إنت بقيت شخص مسؤول عن خطيبتك اللى تعتبر مراتك دي بنت ناس ومتحملة برودك… كتر خيرها إنها متحملة تجاهلك لها، فترة الخطوبه هي أحلى فترة بين أي إتنين مرتبطين ببعض،فيها الوِد والفرحة، بكره فى المستقبل هتندم إنك ضيعت زهوة الفترة دي… فرح بنت زي بقية البنات محتاجه تحس  بشوية إهتمام منك، إتصل عليها واطلب منها تخرجوا سوا، أو حتى تزورها فى بيت أهلها، أنا وباباك وشنا بقي فى الأرض منك، ناقص يقولوا إنك إتغصبت عالجوازة، مبقاش ينفع إنت كاتب كتابك على فرح هتتحسب عليها جوازة قدام الناس، حاول تدي لـ فرح مساحة ومتأكده هتحبها، لكن طول ما إنت قافل على قلبك ومشغل عقلك هتخسر كتير، أنا  بقولك بلاش تضيع أحلى فترة فى حياتك، الشغل مش هيخلص، لكن القسوة بتفضل معلمة فى القلوب.