بحر العشق المالح سعاد محمد سلامه
ردت فاديه:طب ليه ما تخلى بابا يشوفلك واسطه تنقلك من إسكندريه لأى وحده بيطريه قريبه من هنا.
ردت صابرين:
أنا مستريحه فى شغلى هناك تبع وزارة الصحة بشتغل فى الفحص والتدقيق على المنتجات الغذائيه،هنا هشتغل أيه فى الوحده البيطريه هعالج الفراخ ولا هولد الخرفان،وكمان أنا أتعودت على العيشه مع “صبريه” هسيبها لوحدها هناك،دى بتصعب عليا.
تنهدت فاديه قائله: فعلاً أنا كمان بتصعب عليا،بس هى أختارت حياتها زى ما هى عاوزه ومش ندمانه.
ردت صابرين:فعلاً لما مره سألتها قالتلى أنا خدت من السعاده نصيبى وأكتر ومش حاسه بوحده قلبى دايمًا مشغول بــ مروان وحاسه روحه حواليا…تعرفى كان نفسى أتجوز عن قصة حب ولوعه زيها.
تنهدت فاديه قائله:بلا حب،بلا لوعه كله بيحصل بعضه،مش بيقولوا الجواز مقبرة الحب.
ضحكت صابرين قائله:لأ طمنتينى وانا داخله على جواز بعد كام يوم،من الدكتور مصطفى إبن عمى.
ضحك هيثم الذى دخل عليهن يقول:
أنا هوصى مصطفى عليكِ هقوله صبحها ومسيها بالكرباج السودانى.
تهكمت صابرين قائله: إنت أيه اللى دخلك الاوضه يا جاثوم وبتدخل ليه فى كلام البنات.
ضحكت فاديه قائله: جاثوم! يا بنتى حرام عليكِ ده أخوكِ الوحيد مش عارفه ليه دايماً حاطه نقرك من نقره مع إن بينك عشر سنين بحالها.
رد هيثم بإغاظه: بعيد عنك الغِل أصل أنا أما جيت خدت الدلع كله.
نظرت صابرين له بحُنق قائله: أمال مش ديك البرابر، يلا يالا غور من أوضتى روح ذاكرلك كلمتين ينفعوك .
تبسم هيثم وجلس جوار فاديه قائلاً: أنا ضامن أدخل كلية الطب البشرى، مش هبقى زيك وأدخل طب حيوانات وعاوز أقعد شويه مع فاديه حبيبتى قبل ما تمشى، دى مبشوفهاش غير كل فين وفين… كله من حماتها الحيزبون.
ردت فاديه:عيب تقول كده على حماتى يا هيثم.
نظر هيثم لـ صابرين التى ضحكت وقال:
مش أنا اللى بقول دى صابرين هى اللى بتقول ربنا وعدنا أنا وأختى بحموات حيزبونات.
ضحك ثلاثتهم.
بينما نهضت صابرين قائله:وقت القطر هروح أنط فى الجيمبسوت وأرجع تانى.
بعد دقائق عادت صابرين نظرت لإنسجام فاديه وهى تشرح لـ هيثم إحدى المواد شعرت بالآسى عليها لكن قالت بمزح:
متتعبيش نفسك مع الحمار.
تبسم هيثم ونظر لها قائلاً:ماشى خلاص كلها أيام وأمتحن و هثبتلك بالبرهان إنى هبقى
دكتور هيثم سالم التهامى طبيب جراح كمان.