بحر العشق المالح سعاد محمد سلامه
ضحكت صبريه قائله:خلاص أفتكرتها،دى صابرين بنت عمك سالم.
نظر إياد لـ صابرين ثم لـ صبريه قائلاً:متأكده يا ماما ولا أنا حاسس ان دكتورة الحيوانات دى بتستفزك.
ضحكتا صبريه،وصابرين التى قالت:
أنا الدكتوره صابرين سالم التهامى مستفزه يا فاشل.إبقى قابلنى أنت والفاشل التانى لو حد فيكم حتى جاب مجموعى فى الثانويه أخرتكم ستين فى الميه بالرأفه كمان.
تبسم إياد وجلس جوارها قائلاً:حلوين ستين فى الميه يدخلونى اكاديمية الشرطه وانا رجِل على رجِل وأبقى ظابط و أقبض على الحراميه اللى بتسرق البيض.
ضحكت صبريه تقول:بس بلاش تفكرها بالبيض،أنقذنا ما يمكن إنقاذه وعملنا أحلى كيكه لسه سخنه لما تبرد….
قاطعتها صابرين قائله بغيظ:منه لله الحقير اللى زق الشنطه برجله، رغم إنى متحققتش من وشه قوى، بس وشه مآلوف كآنى شوفته قبل كده ولو شوفته مره تانيه هعرفه بسهوله، بس الحمد لله، أهو كويس إنى مكنتش حاطه البيض فى الرده، وحطيته فى الدقيق، أهو أتصرفنا، بس أيه لما تبرد الكيكه إنت قلبك هيحن للواد ده تدى له حتة كيكه،دى من شقى عمري.
نظر لها إياد بمهادنه وإغواء يعلم تأثيره عليها قائلاً:صابرينا حبيبتى أيه رأيك تدينى حتة كيكه وأخدك معايا بكره التمرين فى النادى وأعزمك على أيس كريم بالفانليا.
تبسمت صابرين بإيماءه موافقه.
فقالت صبريه:بس دى تبقى رشوه يا دكتوره.
ردت صابرين قائله:لا دى مقايضه شئ قصاد شئ.
ضحك إياد بموافقه على قول صابرين هو الآخر:
فعلاً دى مقايضه يا ماما، صابرين بنت عمى مبتطلعش خسرانه أبداً.
تبسمت صبريه قائله:يعنى أيه أطلع أنا منها.
اماء الاثنان لها رأسهم بموافقه.
ضحكت قائله:مش عارفه ليه دايمًا بحسك يا صابرين طفله عقلها مش بيكبر،ودايمًا حاطه نقرك من الأصغر منك،إن كان إياد ولا أخوكِ هيثم.
ضحكت صابرين قائله بمرح: يظهر عقدة نقص.
ضحك اياد قائلاً: انتِ عندك نقط نقص كتير، أولها إنك مستفزه.
….. ــــــــــــــــــــــــــــــــــــــــــ
بــــ منزل زهران
بالجناح الخاص بــــ فاروق
كان نائم على ظهره بالفراش ينظر الى تلك السحابه الدخانيه التى تخرج من فمه من تدخين إحدى السجائر سارح بعقلهُ لدرجة أنه غير منتبه لحديث زوجته الى ان خلعت مئزرها وصعدت جواره على الفراش ووضعت يدها فوق كتفهُ قائله:
فاروق…
إنتبه فاروق لها.
أكملت قولها بسؤال: أيه اللى واخد عقلك، سرحان فى أيه بكلمك مش منتبه ليا ؟
رد فاروق:مش سرحان ولا حاجه بس لخبطه فى الشغل ، كنتى بتقولى أيه؟