بحر العشق المالح سعاد محمد سلامه

إنتفض مصطفى الذى يقود السياره وضرب بيديه على المقود بعنف قائلاً:مستحيل أطلق صابرين واسيبها تروح تتجوز من الحقير اللى فرطت فى نفسها معاه موتها عندى أهون.

توقف مصطفى بالسياره أمام منزل سالم…
تحدث له سالم قائلاً بإنكسار:
بلاش إنت تدخل معايا أنا اللى هدخل لوحدى وأقولهم على نتيجة التقرير.

أماء مصطفى برأسه موافقًا،ثم قال:
تمام أنا هروح أغير هدومى،بس بقول كده كده صابرين مراتى مالوش لازمه تفضل أكتر من كده فى بيتك،المسا هاجى أخدها على شقتى.

أماء له سالم رأسهُ بموافقه مجبور.

بداخل المنزل،إستقبل كل من صبريه وفاديه وشهيره نتيجة التقرير بذهول ورفض من صبريه وفاديه،بينما شهيره نظرت لـ سالم صامته تشعر بإنكسار هى الآخرى.
….
بمنزل جمال التهامى
كانت ساميه فى إنتظار عودة مصطفى حين دخل أقتربت منه قائله:
أيه نتيجة الكشف، كلام اللى إسمه عواد ده صح… ولا…؟

صمت مصطفى وترك ساميه وتوجه الى غرفته وقام بفتح أحد الأدراج وأخذ ذالك السلا..ح ووضعه خلف خصره أسفل قميصه العلوى، لم ترى ذالك ساميه التى دخلت للتو تقول له:
قولى نتيجة التقرير، ملامح وشك متتفسرش.

رد مصطفى بإختصار: أعملى حسابك أنا المسا هروح أجيب صابرين من بيت عمى لشقتى.

ردت ساميه بتصميم: صابرين مش هتخطى خطوه هنا فى البيت قبل ما أعرف نتيجة التقرير أيه، قولى، عواد كداب ولا صادق.

رد مصطفى: ميهمنيش كدب عواد من صدقهُ، قولتلك صابرين هتدخل الليله شقتى والسلام.

ردت ساميه بإستفزاز: مستحيل لا أنا ولا أبوك هنرضى بكده قبل ما نعرف نتيجة التقرير، أبوك خرج الصبح عنده تفتيش فى الوحده الزراعيه ولازم يبقى موجود…وزمانه على وصول…قولى وريح قلبى نتيجة الكشف بتقول أيه.

تنهد مصطفى بسآم وبسبب إصرار وتكرار ساميه للمعرفه قال لها بعصبيه:
التقرير بيقول مش عذراء…إرتاحتى كده.

شعرت ساميه بنشوه لكن أخفتها قائله:وهترضى على نفسك واحده فرطت فى شرفها لغيرك،طلقها وكفايه عليها كلام الناس اللى يتمنوا يرجموها،دى تستحق القت..ل،بس بلاش تلوث إيدك بنجاسة دمها، دى مستحقش تضيع شبابك عشانها،طلقها وسالم حر معاها… وتشوف الحقير اللى هربت لعنده وقتها هيرضى ببها ولا هيتخلى عنها بعد ما وصل لغرضهُ منها، أنت مصدق كدبة إنها هربت من المزرعه، هو أكيد خد اللى كان عايزهُ، ومبقلهاش قيمه عنده… فسابها تغور بعيد عنه، وهى طبعاً واثقه فى حبك ليها وعملت تمثلية انها كانت مخطوفه عشان تتلاعب بينا.