بحر العشق المالح سعاد محمد سلامه
تهكمت صابرين قائله: طبيب جراح قلوب الناس أداويها، يا بنى عيلة التهامى للأسف مناصب فقط لكن فلوس متلاقيش، عندك ولاد عمك واحد كان صيدلي والتانى مهندس ميكانيكا لما لقوا نفسهم لو فضلوا فى مصر مش هيلاقوا ياكلوا هجوا على بره… بس أقولك أسعى لهدفك الدكاتره فى مصر لهم مستقبل زى الجزارين بالظبط.
تبسم هيثم قائلاً: ما هم بيقولوا عالدكاتره جزارين، بس أكيد مش هخاف من الحقن زيك ولا بكره ريحة المستشفيات.
ردت فاديه:صابرين بتكره كل الروائح النفاذه حتى البرفانات.
نظر هيثم الى التسريحه بمكر،لاحظت صابرين ذالك وقالت له بتحذير:
أوعى تعملها.
لكن نهض هيثم سريعاً وأتى بتلك القنينه الموضوعه فوق التسريحه وأقترب من صابرين وقام بالرش عليها وألقى تلك القنينه فوق الفراش وغادر الغرفه سريعًا يضحك.
بينما وقفت صابرين مُغتاظه،وقالت لـ فاديه التى تضحك:
بتضحكى على أيه،الغبى غرقنى برفان،وخلاص الوقت آزف يادوب ألحق اوصل لمحطة القطر،ماشى بس أما ارجعلك مش هنساها يا حيوان.
ردت فاديه قائله:وفيها أيه ده برفان فرنسى بعطر الاڤندر.
……….. ـــــــــــــــــــــــــــــــــــــــــــــــــــــــــــــــ
بعد وقت بنفس اليوم
بمنزل زهران
أعطى عواد حقيبة ملابس صغيره لإحدى الخادمات قائلاً: خدى دى إديها للسواق وقولى له يجهز عشان يوصلنى لمحطة القطر.
أخذت الخادمه الحقيبه قائله:حاضر،بس الحاج فهمى أمرنى أقولك أنه عاوزك فى اوضة المكتب.
أماء عواد لها براسه
غادرت الخادمه تفعل مثلما أمرها بينما عواد توجه الى غرفة المكتب ودخل مباشرةً،
رفع فهمى بصره له قائلاً:
أقعد يا عواد عاوزك فى موضوع مهم.
جلس عواد ووضع ساق فوق أخرى قائلاً:
خير أيه هو الموضوع المهم ده.
رد فهمى:موضوع مصنع إسكندريه وتقرير لجنة التفتيش بتاع وزارة الصحه،سمعت إن دكتوره هى اللى كتبته ووزارة الصحه بعتت إنذار غير أنهم هيفتشوا تانى المصنع.
رد عواد:ماجد اللى ماسك إدارة المصنع ده وكذا مره قولت له يلتزم بتعليمات وزارة الصحه سواء كان فى الدبح او حتى تعبئة وتغليف المنتجات بتاعة المصنع لكن هو طبعاً عايش حياته مع مراته وسايب إدارة المصنع لرئيس العمال،أطمن انا بنفسى مسافر إسكندريه دلوقت وهكون فى إستقبال لجنة وزارة الصحه ووزارة الزراعه وهعرف اتعامل معاهم كويس.