سأكتب اسمكِ على الرمال سعاد محمد سلامه من الفصل الاول الى الرابع
هزت رأسها برفض… قائلة
حضرتك بتطلب مني أتجوز واحد أعلن قدام الجميع إنه بيكرهني؟
راوغ قائلًا:
هو قالها وهو متعصب.
التفتت إليه بسرعة.. قائلة بتأكيد:
لا… قالها من قلبه.
ساد الصمت لحظات.
ثم قال سليم بصوت أخفض:
اسمعيني كويس يا ميراچ… الجواز سنة واحدة بس.
رمشت بدهشة… وعادت كلمة
ــ سنة؟
برر سليم:
أهو الشرط واضح… سنة وتخلص، وبعدها كل واحد يروح في طريقه لو حب.
ارتفع صوتها هذه المرة.
يعني أتجوز جواز مصلحة.
أجابها:
سميه زي ما تسميه.
هزت رأسها بعنف برفض قائلة:.
مستحيل.
قبض سليم على المقود بقوة، ثم قال بنبرة تحمل شيئًا من الضغط:
قبل ما تقولي مستحيل… فكري..الحاج نبيل ماكانش راجل يهزر، ولو اختارك بالذات يبقى كان شايف فيكِ حاجة.
سكت لحظة، ثم أضاف وهو ينظر للطريق:
وبعدين… لو رفضتي، يمكن تندمي طول عمرك.
أغمضت ميراچ عينيها للحظات، ثم همست بصوت يكاد يُسمع:
أنا مش خايفة أندم…
أنا خايفة أعيش سنة كاملة مع إنسان بيتمنى حتى ما يشوفش وشي.
ساد الصمت داخل السيارة من جديد…
لكن سليم، على عكس ابنته، لم يكن يفكر في كلمات أديم…
بل كان يفكر في الثلاثين بالمائة من أسهم شركة الشحن، وقد بدأت في رأسه خطة لإقناعها بالموافقة، مهما كان الثمن.
عودة
على صوت وضع لميس كوب القهوة على الطاولة بنفس الوقت هبت نسمة محملة ببعض الرمال أغمض الاثنين عينيهن…ثم إستدارن بوجهن عكس تلك النسمة تفوهت لميس بغضب ملحوظ:
سليم طول عمره شخص وصولى بلاش تسمعي كلامه…إحنا مش محتاجين الحمد لله مستوانا المادي كويس جدًا وإنتِ بتشتغلي فى شركة محترمة لها فروع خارج وداخل مصر..بلاش تربطي حياتك بوصية ممكن….
توقفت عن الحديث حين سمعن من دخل الى الشُرفة قائلًا باعتراض بارد:
هتربط حياتها…دي سنة واحدة وبعدها تقدر تكمل حياتها ولا كأن في حاجة حصلت.
استدارت لميس نحوه بضيق، وقد انعقد حاجباها… قائلة بغضب:
إنت شايف الجواز عقد إيجار؟ سنة وتتفسخ وخلاص؟
تقدم سليم بخطواتٍ هادئة حتى وقف أمامهما، واضعًا كلتا يديه داخل جيبي بنطاله، ثم قال بثقة:
أنا شايفها فرصة عمرها… وصية الحج نبيل هتغير مستقبلها كله… سنة تضحية مقابل حياة كاملة من الاستقرار والنفوذ.