سأكتب اسمكِ على الرمال سعاد محمد سلامه من الفصل الاول الى الرابع

رفع حاجبه باستغراب.
فأكملت وهي تنظر إليه مباشرة:
لأن الجواز ده بالنسبة لي تنفيذ وصية… مش حلم عمر.

ارتسمت ابتسامة باردة على شفتيه..قائلًا:.
أخيرًا اتفقنا على حاجة.

ردت دون أن تهتز:
بس فيه فرق بين إننا نختصر مراسم ملهاش لازمة… وبين إننا نقلل من احترام وصية جدي.

تدخل المحامي سريعًا قبل أن يتصاعد النقاش.
المرحوم موضح في الوصية إن عقد القران لازم يتم بصورة قانونية ومعلنة، أما حفل الزفاف فمتروك لاتفاقكما.

نظر إليه أديم وقال بلهجة حاسمة:
يبقى مفيش زفاف… كتب كتاب بحضور الشهود وخلاص.

التفت المحامي إلى ميراج قائلًا:
ورأيك يا آنسة ميراج؟.

أجابت بعد لحظة صمت:
معنديش اعتراض… لكن كتب الكتاب هيكون في بيت والدتي… مش في بيت المأذون زي ما الأستاذ أديم اتفضل وقال.

نظر إليها أديم باستهزاء.
هو إنتِ داخلة تتجوزي… ولا داخلة تعملي مؤتمر صحفي.

ابتسمت ابتسامة خفيفة، وقالت بثقة:
لا ده ولا ده… بس واضح إنك مستعجل تخلص، وأنا مش بحب أخلص أي حاجة بدون ترتيب.

للمرة الأولى… لم يجد أديم ردًا سريعًا.
ظل ينظر إليها لثوانٍ، ثم قال من بين أسنانه:
أسبوع… وبعدها يتم كتب الكتاب.

أغلق المحامي الملف وهو يبتسم براحة.
ممتاز… يبقى أعتبر ده اتفاق مبدئي، وأنا هبدأ في الإجراءات.

وقف المحامي يجمع الأوراق بعناية، ثم قال وهو يضعها داخل الملف:
خلال هبدأ فى إجراءات تسليم الميراث… .
أومأ أديم دون اهتمام، قائلًا!
تمام… لو خلصنا… أنا ماشي.

اوقفه المحامي:
لو سمحت يا أديم.

التفت إليه بنفاد صبر.. قائلًا:
خير.

ناوله المحامي ظرفًا صغيرًا.
فى نص مهم فى الوصية بتنص إنكم تقيموا مع بعض فى مكان واحد فيها طول مدة تنفيذ الوصية.

نظر أديم له ثم أطلق ضحكة ساخرة… قائلًا باستهزاء:
لأ… كده كتير.

رفع عينيه إلى المحامي وقال بحدة:
يعني هتجوزها غصب عني… وأعيش معاها كمان.

أجابه المحامي بهدوء:
دي رغبة المرحوم.

اشتعلت عيناه.
أشار بإصبعه نحوها. قائلًا:
اسمعيني كويس… أنا موافق على الوصية عشان خاطر جدي وبس، إنما متفكريش لحظة إن وجودك هيفرض عليا أي علاقة بينا.

أجابته دون أن يتغير صوتها:
متقلقش… لو في حد نفسه العلاقة دي تفضل في حدود الورق، فهو أنا.