سأكتب اسمكِ على الرمال سعاد محمد سلامه من الفصل الاول الى الرابع

ابتسم ابتسامة خالية من الدفء قائلًا:
من وقت ما بقيتي جزء من الوصية.

تجمدت ملامحها…
كلماته أعادت إليها كل ما حاولت الهروب منه.
الوصية…
العام الذي ستقضيه معه…
والعداء الذي بدأ قبل أن يبدأ أي شيء…
فتح أديم باب السيارة من الداخل، ثم قال دون أن ينظر إليها:
لو كنتِ راجعة عشان تتراجعي عن تنفيذ الوصية، وفري على نفسك المشوار.

اتسعت عيناها بدهشة، بينما رفع نظره إليها أخيرًا..
لأن المحامي اتصل بيا من شوية.

ابتلعت ريقها بصعوبة سائلة:
وقال لك إيه.

ثبت عينيه عليها، ثم قال بهدوء أربكها:
قال إن رغم إننا خلاص إتفقنا بس إنت لسه مترددة فى قرارك النهائي.

سكت لحظة، ثم أضاف:
وأنا جيت أساعدك تاخديه.

نظرت إليه ميراچ طويلًا، تحاول أن تفهم ما وراء كلمات وإستهزأت قائلة:.
وإنت اللى هتساعدني.

ضحك أديم ضحكة قصيرة خالية من المرح قائلًا:
أيوه… لأن واضح إنك مش عارفة مصلحتك فين… كنت أتمني ترفضي وتستمري على قرارك مش هتعملى شوية حركات ملهاش معني.

اشتعل الغضب في عينيها.
وأنا مش محتاجة حد يقرر بالنيابة عني… وكمان مش بعمل حركات،…

قاطعها قائلًا:
يبقى اركبي ونحسم الموضوع.

هزت رأسها برفض قائلة:
مش هركب معاك.

أغلق أديم عينيه لثانية، وكأنه يحاول السيطرة على أعصابه، ثم أعاد النظر إليها.. قائلًا بعصبية:
ميراچ، أنا مش فاضي لألعابك.

تحدته قائلة:
ولا أنا.

-يبقي اركبي.
بعناد:
قولت لأ.

ظل ينظر إليها للحظات، ثم أطفأ محرك السيارة وترجل منها.
تراجعت خطوة دون أن تشعر، حين أغلق باب السيارة خلفه واتجه نحوها…
وقف أمامها على مسافة قريبة، وقال بصوت أكثر هدوءًا:
إنتِ فاكرة إن تنفيذ الوصية هيكون سهل

لم ترد عاود الحديث:
سنة كاملة… كل يوم هتقابليني فيه، وكل قرار هيتاخد هيكون بينا، وكل واحد فينا هيحاول يثبت للتاني إنه أقوى.

اقترب قليلًا، ثم قال:
وأنا عارفك كويس كفاية عشان أعرف إنك مش هتقدري تكملي أسبوع واحد.

رفعت ذقنها بتحدِ قائلة:
متأكد.

أجابها:
متأكد جدًا.

تفوهت بتعالي:
يبقى إنت اللي خايف.

تغيرت ملامحه للحظة.
ابتسمت بانتصار صغير، لكنها لم تلحظ البسمة المُستهزأة التي إرتسمت بعينيه…
تفوه ببرود:
أنا…أديم القصاص.. أخاف منك.