سأكتب اسمكِ على الرمال سعاد محمد سلامه من الفصل الخامس الى التاسع

“مثالية”
الكلمة استفزت كارلا فاقتربت منها وقالت بحدة:
دي قناع هي بتلبسه بس أديم فاهمها كويس

رفعت والدتها حاجبها باستغراب… فأكملت:
أيوه… أديم عمره ما حب ميراچ، وده أنا متأكدة منه… لو كان بيحبها، مكنش كل ما اسمها يتقال قدامه يتغير ملامح وشه.

جلست والدتها من جديد، وقالت بحذر:
حتى لو ده حقيقي، هو دلوقتي متجوزها.

ردت كارلا دون تردد:
جواز ع بسبب وصية. يعني مش مستحيل ينتهي.

ثم سكتت قليلًا، قبل أن تسأل:
سليم قال لك إيه تاني؟

نظرت إليها والدتها بتردد… ثم قالت:
قال إن ميراچ نفسها ما كانتش عايزة تنفذ الوصية في الأول، وإنها كانت مترددة في الجواز… بس أديم وافق الأول

ابتسمت كارلا ابتسامة جانبية.. قائلة:
يعني كمان بتمثل ومش عايزاه.

تفوهت والدتها بضيق… سائلة:
إنتِ بتفكري في إيه؟

أجابت كارلا وهي تتجه إلى حقيبتها:
ميراچ مش بتحبه، وأديم بيكرهها، والجوازة كلها قامت على شرط في وصية… إنتِ عايزة إيه أكتر من كده؟

قالت والدتها بصرامة:
حاذري، بلاش تظهري إنك مدلوقة.

تفهمت كارلا وهي تجذب هاتفها،
ثم رفعته ونظرت إلى شاشته، قبل أن تقول:
وأنا هفتح له طريق تاني.

شهقت والدتها:
كارلا فهميني إيه فى دماغي خليني معاكِ عالخط.

لكنها لم تجب… كانت قد بدأت تكتب رسالة، وعيناها تحملان إصرارًا لم تره والدتها فيها منذ سنوات…
هذه المرة، لن تنتظر عودة أديم إليها…
ستذهب هي إليه… ولا مانع من بعض التنازلات فى سبيل هدف.
❈-❈-❈
بشقة قريبة من شقة لميس نفس المستوى
اشتعل الغضب بعقله، وقال لوالدته بذهول لم يستطع إخفاءه:
مستحيل… ميراچ إزاي وافقت تتجوز من أديم؟! يعني أغيب كام يوم في مأمورية تبع الشغل، أرجع ألاقيها اتجوزت حصل ده إزاي.

نظرت إليه والدته بقلق، ثم تنهدت قائلة:
اهدى يا بني، الموضوع مش زي ما إنت فاهم.

رمقها بنظرة حادة، ورد بانفعال:
أمال إيه أنا كنت فاكر إن ميراچ مستحيل توافق عليه، خصوصًا بعد كل اللي حصل بينهم… إزاي فجأة تبقى مراته لدرجة إن محدش حتى فكر يقولي.

خفضت والدته عينيها للحظات قبل أن تقول:
لأن الجوازة دي ماحصلتش فجأة… كان فيه سبب، وميراچ وافقت وهي مضطرة.

تجمدت ملامحه، وسألها بقلق:
مضطرة يعني إيه مضطرة.